جمالين يوسف کنعانه بنزر

بويون سرو سهی زولفون معنبر

جمالين يوسف کنعانه بنزر

قاشين عاشيق لرين قصدينه گويا

خم اولموش تيغ سر افشانه بنزر

آچاندا گوزلرين آلير بو جانی

ياتاندا فتنه دورانه بنزر

با خاندا نازيله تير نگاهين

کونولده خنجر برانه بنزر

ديلون بولبول ساچين سونبول اوزون گول

کج اولموش کيپريگين پيکانه بنزر

مه رخسارين ای حور بهشتی

گولستاندا گل خندانه بنزر

ويريب باد صبا زولفون داغيتميش

گول اوزده دسته ريحانه بنزر

لب لعل شفا بخشين عزيزيم

بعينه چشمه حيوانه بنزر

خالين هندو صفت کونج لبينده

اوتورموش تخت آرا سولطانه بنزر

سنين کوينده عاشيقلر فغانی

چمنده بولبول خوش خوانه بنزر

گوزوم ياشی فراقوندن اوزومه

سراسر لولوء غلطانه بنزر

اگر چه عاشيقين چوخدور وليکن

اينانما هئچ بيری حيرانه بنزر

شهيد خنجر ناز

هاني بير اهلِ درد، آگاه اولا رازِ نهانيمدان

وئره دوغرو نيشان معشوقِ بي نام و نيشانيمدان

دل و دلبردن اؤترو اهلِ دل آردينجا، چوخ دوشدوم

نه بير دلدن سوراغ آلديم نه يارِ دلستانيمدان

منيم دؤورومده ياتماز بير نفر، امما تعججوبدور

ياتان بختيم اويانماز بيرجه فرياد و فغانيمدان

زيان وسود و خير و شرريمي بيلمزديم اوولدن

دوشوب سئوداي عشقه، آنلاديم سودي زيانيمدا

طريقِ عشقده بيرهمرهيم يوخ سايه دن غيري

گئدر اول بي وفادا ظولمت شب گلسه يانيمدان

گوزوم ياشي توكندي احتياجيم يوخ بحمدالله

آخار خونِ جيگر پيوسته چشم خون فشانيمدان

پياپي داغِ دلدن كوهكن تك داغلار ساللام

اگر آلسام اجازه خسرو شيرين زبانيمدان

ملامت داشينا اي مددعي! باشيم نيشان ائتمه

حذر قيل تيرِ آهِ قامت همچون كمانيمدان

دئمه اي باغبان! سروِ قدِ جانانه بي حاصل

تُرنجِ غبغبه باخ ، آسلانيب سرو روانيمدان

شهيد خنجر ناز اولماغا چوخداندي موشتاغام

الين قورباني لوطف ائيله كرم قيل كئچمه قانيمدان

سنه قوربان، به غير از نقدِ جان بير برگِ سبزيم يوخ

سعادتدير، اودا گر چيخسا جيسمِ ناتوانيمدان

اوچار روحوم اگر تير نگاهين كئچسه جيسميمدن

چيخار جانيم اگر پيكان غمزه ن چيخسا جانيمدان

دئديم جانانه منظورون عيار قلبي بيلمكدير

گليب صررافه شاگرداول آياق چكمه دوكانيمدان

نيمه شعبان گونشي

نيمه شعبان گونشي نور ساچور

نورِ موباركله اوركلر آچور

ايستي وئرور نوري منيم جانيما

جانلانورام قمله كدرلر قاچور

اؤزي او

اوولينده اؤزي او
آخيراجان اؤزي او
موقددس پيوندوزه
قاتسون دادي دوزي او
پناهينده سيزي او
حفظ ائيلسون اؤزي او
ائيلسون بو تويوزي
موباركلي اؤزي او
اوغلاني او قيزي او
ياراديبدور اؤزي او
محببتلي ائيلسون
بيربيروزه سيزي او
ياراديبدور سيزي او
تبريك دئيب اؤزي او
جان دئيب جان ائشيدون
چون ياراديب سؤزي او
دوز ياراديب سيزي او
دوز دانيشيب سؤزي او
دوز دانيشون دوز گزون
چوخ سؤويري دوزي او
امر ائيلئيوب اؤزي او
ايزديواجا سيزي او
موبارك ائتسون سيزه
ايزديواجي اؤزي او
گوزتله سون سيزي او
شاد ائيلسون سيزي او
يوسون اوركلروزدن
غوبارلاري توزي او
ياي ائيلئيور يازي او
يازي يازان اؤزي او
ايشيقلاتسون نوريلان
اوره گوزي اؤزي او
كوك ائيلسون سازي او
چوخ ائيلسون آزي او
فيروزي آيدين دئيور
خوشبخت ائتسون سيزي او

جان آلان

منه جان وئرن؛ سونرا جان آلان
وئرديگيدين آلان دئديگي يالان
عاشيقم سنون آلا گوزووه
آي منيم ائدن ائويمي تالان