مستانه

ساقیا دور دولانیم باشینا ، گل دؤورانه
جام زرینی گؤتور ، بیرجه دولان مستانه
تار زولفون کیمی ، ظالیم ! منی بی جان ائله دین
گتیر اول روح روان ایله منی بیر جانه
گؤرمه سین اؤزگه گؤزللر من مجنونو ، مگر
سالیب اول کافر بی رحم منی زندانه
عشقدن گؤر نه عجب نفعه یئتیشدیم ، وه ! وه !
عاقیل عصر ایکن ، ائتدی منی دیوانه
قورخما نئیران فراقین ، شرریندن ، ای دل
صدق ایله دوت اؤزونو بیرجه شه مردانه
اسم اعظم دئییلن اسم علی دیر ، بالله
گزمه بی جا یئره نسناس کیمی هر یانه
ائتمز اقرار ، نباتی ! بو سؤزه زاهید دون
گلمز ایمانا یقین ، آند ایچه سن قرآنه
حکیم سید ابوالقاسم نباتی

دوغوم گونون موبارک

عطا! اوغلوم! دوغوم گونون موبارک
سنون ایلون، آیون، گونون موبارک
سنی بیزه، الله ائدیب دور عطا
قَدَم لری، سن تک گولون موبارک
عزیز بالام، گوزل بالام ، گول بالام
اولسون سنون یایون، یازون موبارک
یئیب ایچیب، تازه جاوان اولوبسان
قد آتیپ سان، سنون بویون موبارک
اون دوردیدن، یاخشی کئچوب گلیبسن
اون بئش یاشا، گیرمَگلیگون موبارک
سئوینجیلن، چوخ یاشا سن عزیزیم
آرزیم بودور اولسون عمرون موبارک
چالیش گیلن عمرونده سن دوز یاشا
اولسون سنون اوجا باشون موبارک
دوز دانیش سن، گَلسده اوندان ضرر
تانری ائتسون سنون دیلون موبارک
بیلگی اورگن، کی هر کَسه لازمدور
چوخ شئی لری بیلمَگلوگون موبارک
چالیش اولسون احترامون عززَتون
ادب، حورمت، قازانماغون موبارک
اسلام دینی اولسون سنون هدفون
سنون بو دینون مذهبون موبارک
هاممی لیغا بیردن اورکدن دییون
دوغوم گونی فیروزی نون مبارک

دکتربهنام فیروزی

گوزلر

یول دا قالوب گوزلر ای یار سنی گوزلر
غمله دولوب اوزلر گریان سنی گوزلر
یاشلان دولوب گوزلرسیلاب اولوب اوزلر
یاشلان دولان گوزلر دایم یولی گوزلر
گریان اولان گوزلر خوممار باخان گوزلر
یاتمور گئجه لرده، گویچک گونی گوزلر
ویران اولوب کونلوم هیجران گئجه سینده
ویران اولان کونلوم خوش گونلری گوزلر
دایم اَسور توفان یارپاق توکور گول لر
یارپاق توکن گول لر آغلار یازی گوزلر
باغدا صفا یوخدور، پَرپَر اولوب گولر
پرپر اولان گول لر ایستی یایی گوزلر
داغدا قاچار آهو، هی هی مه لر جیران
داغدا مه لر جیران صییادینی گوزلر
گوی ده اوچار یاهو تئز تئز دییر یاهو
یاهو دیین قوشلار شهبازینی گوزلر
داغدان آخار سولار بندی ییخار سولار
چای دا آخان سولار دریاسینی گوزلر
دلده یانور کؤزلر گریان اولور اوزلر
گریان اولان اوزلر بیر خوشگولی گوزلر
گل ای عزیز یاریم کونلوم سنی ایستور
گَلسون گولر اوزلر خندان اولی گوزلر
آه و افغانیله یول دا قالوب گوزی
فیروزی پریشان دور، مولاسینی گوزلر
دکتربهنام فیروزی

حسنوون جلوه سی

تاگوزوم دوشدی سنین زلف خم اندر خمووه
باشا دوشدوم مارالیم تور توخویوب سان عمووه
کونلومو کیرپی یه اوخشاتدی سنین مژگان اوخون
لطف ائدیب اوخلاری چک یوخ نیازیم مرحمووه
دوشموشم چاه زنخدانووه کله ام یاریلیب
قورخورام گئج گه له سن قان قاریشا زمزمووه
مهرون اسگیلمه ده،داشماقدادی قهرون قازانی
نئیله مه ک ائتمیشم عادت بالا،بیش وکمووه
حسنوون جلوه سی آیدین گونشه شیللاق آتیر
اودا بیرپای دی چاتیب محرم ونامحرمووه
سن او داشدان یونولان پیکره سن آند ایچره م
باتا عالم یاسا بیر بوغداجا آرتمازغمووه
ایسته سن سونبول افشانووه ده ن دولسون اینان
من کیمی بیرنفرایستر کی سو آچسین زمووه
گل چمن سیرینه ای سروچمان چوخداندی
چول یئریک لر نئچه مدت دی سنون چم خمووه
نئچه یول غرق ائله یب دیر منی دریا باخیشین
اذن وئر بیر دونه عاصم مینه بیلسین گمووه

نرگس مستانا دولاشما

ای دل او گوزل نرگس مستانا دولاشما
جاندان دویاسان، چاه زنخدانا دولاشما
سن بو قارا گوزلو، اوزو دوزلو، گوزو سؤزلو
ائللر مارالی یوسف کنعانا دولاشما
قددون بوکولر قامت موزونون اولار دال
گولشن گوزلی، نوگول خندانا دولاشما
گؤرسؤن چیچَکی، لاله نی، آلاله نی،یاسی
دیللنمه لال اول، بولبول دستانا دولاشما
عشق اهلینی اوخلارلا کمانیله ویرارلار
یوخدورسا دؤزوم، ناوک مژگانا دولاشما
دَیمه بو اوخا کونلومه سانجیب اونو یاریم
کونلوم قوناغی، سئوگولو،مهمانا دولاشما
اود توتسا اورک یانسا، اگر آتش عشقه
هیجران اودونا دوز،غمِ هیجرانا دولاشما
سن گئتمه دالیجا، اوجا داغ دان ییخیلارسان
قال دالدا، گوزو سورمه لی جیرانا دولاشما
اَل ویرما کؤزه، آتش سوزانه یانارسان
"پروانه کمی شمع شبستانا دولاشما"
پیمانه سینار،می توکولر اَل لرون اوسته
عهد ائیله گیلن، عهدیله پیمانا دولاشما
باش اَگمه بوتا، بوتکَدییه، لات ومناته
کافیر بالاسی!دینج اوتو! ایمانا دولاشما
جهد ائیله گیلن سن اولاسان لایق جانان
عمرون ده گولوم عاشیق نالانا دولاشما
گرحکم ائلسه، سئوگیلری داره چکیلسون
سال بوینا ایپی، سعی ائله، خاقانا دولاشما
باغرووی یارار، قانوون ایچر، سندن آلار جان
آيدين اوزووي حفظ ائله جانانا دولاشما
دکتربهنام فیروزی

نماز

دینون سوتونی ناماز دور ناماز
خِلقَت، هدفی ناماز دور ناماز
سئو لردی گوزل نبی اسلام(ص)
گؤزوم ایشیغی ناماز دور ناماز
آختار سون اگر گوزَل بیر عمل
لاپ یاخشیلاری ناماز دور ناماز
آختارسون اگر ایشیق لیغا یول
دؤم دوزجه، یولی ناماز دور ناماز
سن سای سون اگر فروعِ دینی
لاپ باشچیلاری ناماز دور ناماز
پیسلیگدَن اوزاغ ائدن انسانی
گر اورگَنه سن ناماز دور ناماز
شیطانیله، آدم، ساواشاندا
قووَتلی قولی ناماز دور ناماز
کافیرلیگیله، موسَلمانلیغون
یاخشی مَریزی ناماز دور ناماز
درگاهِ حَقه قبول ائتدرین
باشقا عملی ناماز دور ناماز
ظولمَتلی اولان قَبیر ائوینون
نوری، ایشیغی ناماز دور ناماز
ایلرله سؤال قیامت گونی
اووَل سؤالی ناماز دور ناماز
آلله یارادیب سنی فیروزی
بوندان هدفی ناماز دور ناماز

دکتربهنام فیروزی

گل ،گئت

گل بوشان شان اوره گین قصه سین انشاءائله گئت
بیربه بیر ووردوغون اوخلاره تماشا ائله گئت
آیریلیق دان نظر ائت گوزده ن آخان قان یاشیما
قطره لرده ن توره نن چشمه نی دریا ائله گئت
گیزلی اسراریمی ائل ده ن ائله دیل ده ن دیله سال
سن ده مجنونونو ائل لر آرا رسوا ائله گئت
داغلی یام بارلی باغین پنجره سین آچ اوزومه
قاراقیش دان قارالان باغریمی احیا ائله گئت
بیرباخیش سئوگی یه ایل لر بویو حسرت ده وارام
گل گولوم گل اونو بو جان ایله سودا ائله گئت
قتلیمین حوکمونو سن سیزلیگیم امضا ائلئیب
گل بو محکومون اوزون حوکمونو اجرا ائله گئت
ظلماتین داش قلعه سین ده ن باشا داش یاغمادادیر
تکجه بیر جلوه قارانلیق دا تماشا ائله گئت
باخ بو وحشت ده بوغولموش آجی قیشقیرتی لارا
لال سکوت دان دوغولان های کویو معنا ائله گئت
گئجه نین باغلا قارا معجرین آیدین سحره
گوندوزون خیمه سینی اولکه ده برپا ائله گئت
عاصمین دردی آغیر اولسادا یونگول دو یوکو
گل بو قارقانمیش ایلان کوسمه مدارا ائله گئت
صالح عاصم اردبیلی

ساوالان

آی ساوالان گورسم سنی، سئوینرکن،کؤنلوم آچار، کدرلریم اوره گیمدن چیخار گئدر
کونلوم قوشو چوخ چیرپینار،آزاد اولار،قاناد چالار،آواز اوخور، اوجالارا، اوچار گئدر
اوجالاردان باخار ییره، دایاق گورر سنی ییره، ،ائلیمیزه سلام وئرر، حرمت ائلر
یولون سالار هر طرفه، اوچا اوچا،اولکه لری آرار گزر، سن اولماسون آزار گئدر
سنون قیشون چتین اولار، قار قولاغا گوزه دولار، سنون اوزون آغ اولارکن باش اوجالار
هامی بیلر، قارا قیشون آخیریندا ،حق قاپیسین، خیدیر نبی ائل اوزونه آچار گئدر
ائل فیکرینه سن قالارسان، باشوندا ساچون آغارار، سویوق اولار، سن دونارسان بوز اولارسان
یاز گلنده گونش شاخار، قیزار هاوا، قارلار اٌَرور، سووا دؤنیب، داغدان داشدان آخار گئدر
آخار سولار سندن آخار، یئره هوپار،چوخورلاردا، سرین سویون بولاقلاردان اوینار چیخار
گوللر ایچر،چیچک لنر، بولبول باخار هوس لنر، چه چه وئرار،آرامیلان، قرار گئدر
سویوق گونلر، قارا قیش لار قویار قاچار،چن چکیلر، قارانقوج لار گوی اوزین ده جولان ائدر
بایرام یئلی اولکه میزده گلیب گزر،قاری اَزر،گوزل لیگی یئر اوزونه جالار گئدر
ائل باریشار، یئر قیزیشار، لاله چیخار، گوللر گولر، اوتلار بیتر،مال لار یییر،داوار یییر
بولود آغلار،یاغیش یاغار، مه ده قاچار،گونش شاخار، یاشیللیغی چمن لره یاخار گئدر
قوزو اوینار،قویون ملر، اوردک اوزر، قازلارگزر،خوروزلاردا واختی آنلار اوندان بانلار
ایت لر هورَر،آتلار کیشنر،قوش لار اوچار،باهار گلر گول چیچکی کول بوداغا تاخار گئدر
گولمج لرده یاشیل باشلی صونا اوزر ،داغدا داشدا خومار گوزلی مارال لاردا یئیین گزر
تویوق لارون ییمیرتدئیب، هوسله نر، قاقلیلدایار،گوی اوزونده دورنا لارون قاطار گئدر
اَکین بیتر، سونبول دولار، اَکن بیچر، خرمن اولار،دنی قالار،یئردن ییغیب تای تای ائلر
کامییوندا، وانت لرده،آمبارلارا، یئرآلمالار،آرپالارون بوغدالارون زومار گئدر
طرلان اوچار گوی دن باخار، آسلان قاچار دوشان توتار،اووچی اووا کمین ائدر گولله آتار
گوزل، گویچک،خومار گوزلو ،گونش اوزلو جیران لارون دوزلیگلره قیقاجیدان باخار گئدر
داغدان داشدان چایلار آخار شاققیلدایار، کهلیک اوچار قاققیلدایار، بولاغ لاردا پیققیلدایار
گوزل لیگی گورمگ همین، محببتلی اورک لره، طبیعت دن سئوینج لر داشار گئدر
قینرجه ده،سرداوادا، سرعیینده ایستی سولار،قاینار سولار، درده درمان، سندن چیخار
یایدا، یازدا اولکه میزده، اَتگونده،قوناق لارون، مهمان لارون بئش آلتی گون قالار گئدر
چمن لرون، سوسن لرون، چیچک لرون، لاله لرون، اولکه بزر، قوناق لارون یئییب گزر
گوزل لیگدن، یاشیل لیغدان،پاک هاوادان،ایستی سودان، شیرین بالدان ،شفاسینی آلار گئدر
یئل لر اَسر،بولود گلر هوا توتار، ایشیق شاخار، گوی گورولدر، گوی لر آغلار یئر، سئوینر
اولکه میزه یئل لر اَسر، یاشیل یارپاق گوزل گویچک،آغاجلارون، تلله رینی دارار گئدر
یاغیش یاغسا، هاوا قیزسا، قار اَریسه،آخار سولار،یولا دوشر سورعت لنر دو گوتورر
سئل اولارکن داغدان گلر، داشدان آشار، دره دولار، چوخ گوج لو دور،بَت، بره نی ییخار گئدر
یازیچی لار سوزون یازار،شاعرلرون شعر دییر،عاشیق لارون گوزل لَردن اوخویاللار
باهار گلر، بایرام اولار، شادلیق اولار،ائل سئوینر،حاجی فیروز، ناغاراسین چالار گئدر
ائلون رسمی چوخ گوزل دور، ائولری بیر بیر گزللر، کدر اورسا، اور ک لرده یاددان چیخار
الله سوزون یاده سالیب،گوروشل لر،اوپوشل لر ،تکم سوزی، کدرلری یووار گئدر
کدر گئدر سئوینج گلر،سویوق گئدر ایستی گلر،یامان گئدر یاخشی قالار یاخشی قالار
ائل بیرلَشر،یاخشی سوزلر،دئیب گولر،محبتلی سوزلر سینیق، اورکلری یامار گئدر
ایذن ورسون ، ساواشاللار،دؤوؤشللر،ظالیم لری،یاغی لری، دوشمن لری،کافیرلری
آزغین لاری،خائن لری،نامردلری،یامان لاری، اَرَن اَرَن ایگیدلرون، قیرار گئدر
دوشمن بیزه تور توخوسا،آیاقا دورسا ساواشا، گلسه بیزلَن، چاققیشیلان،توققوشا
جاوان لارون،ایگیدلرون ،دوشمن لری اولدیرمگه، آشلان تکین،قافلان تکین جومار گئدر
ائلریمیز همّت ائلر، تانری بیزه یاردیم ائدر، چالیشماق دان یورورماروق، دایانماروق
الله دئییب دایانسوق بیز، بیرلیگ اولسا،وحدت اولسا، قارا گونلر،یامان گونلر، قاچار گئدر
مومونون دستَماز ائدر، نامازلارین ادا ائدر،اوندان سونرا، ال گوتوروب دوعا ائلر
آتا لارون، آنا لارون دوعالاری،آلقیش لاری،یامان گونون پیسلیک لرین پوزار گئدر
خانیم ننه لای لای دییر، اوشاغیدا سودین یییر،سودَن دویار، اوندان سونرا،خومار یاتار
گوزل ناخیش، جیران باخیش،املیک اوشاق، گول بالاسی،بئشیکینده، رویالارا اؤیارگتدر
اوشاق لارون درس اوخویار، سوز اؤره نر، بیلگی بیلَر،دوزگی بیلَر، ایش اؤره نر،دوز اؤره نر
جاوان لارون چالیشیغی،آلیشیقی، گلجکده یاخچی گونلر یازیسینی، یازار گئدر
ایگیدلرون،جاوان لارون غربت یئره قویوب گئت سه، آیری یئردن، سنی یادا سالیب گلر
اوزاق دوشن، وطنیندن،شَهَریندن ،غوربت یئردن ،محببتی اوز ائلیندن اومار گئدر
طلبه لر درس اوخویار جهد ائلییر،عالیم اولار، عوام اوچون اؤرَتمَگه عازم اولار
قُرآنداکی،حَدیثدکی شرعون حوکمون،دینون سوزون، دارالارشاد اردبیلده قانار گئدر
سئوگیلیگده عاشیق لارون،سئوگیلَرون، صادق اولار،اوز عشقینده دایم اولار، ثابت اولار
بو اولکه دن،فرهاد لارون، شیرین لره چاتماق اوچون، گئجه گوندوز،داغ، داش لاری یارار گئدر
اوجا بویلی، گونش اوزلی، گوزل خویلی، دادلی دوزلی، قیز گلین لر،اوزین بزر، یارین گَزَر
عاشیق لارون سینه سینه،قارا گوزلو، گوزلو سوزلو ،گوزل لرون، کیپریک اوخین آتار گئدر
من عاشیغام، اوز اولکه مون جیرانینا،مارالینا، قوربان اولوم، اوجا بویلی اوز یاریما
منیم یاریم،گول یاناغیم،شیرین جانیم،اوز سئوگیلیم،عشق اودونی اورکلره سالار گئدر
ساوالان دان آلیب کوزون،یوخدور سوزیم، کونول ده قالمئیوب دوزوم، من بو اودا نئجه دوزوم
سئوگیلیگده،عاشیق لارون،سئوگی لرون، کونول لری، اورک لری، عشق اودینا یانار گئدر
آی ساوالان، فیروزی یام،من سندن الهام آلمیشام ،سنون کیمی،حق دئییبَن دایانمیشام
سندن بیزه همیشه لیگ،یاخشی گومان، اومید، پیمان، ایثار، ایلقار، ایمان، غیرت دامار گئدر

دکتربهنام فیروزی

سنی من گورممیشیدیم ولی سنلن تانیشیدیم

عاصم قوجامان شاعر آدلی شعرون جاوابیندا، جناب عاصم اردبیلینون نامه سی و شعری

سنی من گورممیشیدیم ولی سنلن تانیشیدیم

نه دن ؟
بوباغین بولبولو بیرده ن بیره لال اولدو نه دن ؟
قوزقونا قارقایا جولانه مجال اولدو نه دن ؟
شانلی یازکسمیشیدی قاره قیشین بوز نفسین
یازا چیخمیش صونالارغرق ملال اولدو نه دن ؟
هانکی صرصر الی پرپر ائله دی گول چیچگی
بوبرومندآغاجین میوه سی کال اولدو نه دن ؟
بیز کی جان جان دئمه دیک اولکه ده قان قان دئینه
سئوگی منظومه سی حال اهلینه قال اولدو نه دن ؟
مِیِ انگوری سؤزوم یوخ کی حرام ایدی بیزه
انسانین قانینی نوش ائتمه ک حلال اولدو نه دن ؟
بیز بیلردیک کی دوغولماز یئنی دن رستم زال
یوردون حرّاجه قویان رستم زال اولدو نه دن ؟
ایسته دیک سیره چیخاق ماوی سمالرده بیرآن
سیندی قُول یاندی قاناد سیرمحال اولدو نه دن ؟
آی کیمین آیدینیدی (عاصمه) ناحقّیله حق
پس حقین قامت موزونو هلال اولدو نه دن ؟
صالح عاصم اردبیلی 6/9/1388

گوزلر یولی گوزلر

اوجا بویلیم گوزل خویلیم هارداسان
قارا گوزلیم دادلی دوزلیم هارداسان
سن سیز منه یامان کئچیر گونلریم
گل دادیما یئتیش ، گولیم هارداسان
یالقیز قالدیم، سن گئدندن، تئز قاییت
گوزلریولی گوزلر، قارا گوزلیم هارداسان
منیم جانیم سنه قوربان اولایدی
سنی چوخ ایستئییر مئیلیم هارداسان
هیجران منی داریخدیریب نئیلئیم
سنی ایستیر منیم کونلیم هارداسان
هیجران کؤزی دولیب منیم کونلومه
گل گوزلیم قادان آلیم هارداسان

فیروزییم سنه چوخدور علاقه ام
شیرین جانیم منیم پاییم هارداسان

دکتربهنام فیروزی

اولماسایدی

جاندان دوشردی کونلوم، جـانانه اولماسایدی
چاتمازدی شمعه شهرت، پروانه اولماسایدی
تـئللر اسـیب سـالاردی عـاقیللری آیــاخـدان
زنــجیر زولفــه بـاغلی دیــوانه اولمــاســایدی
میخانه لرده باده مـوشکول دوشــه ردی یـاده
آهـو باخیشلی گــوزلر خـمخانه اولمـاسـایدی
بــــاد صـــبا پــوزانــدا گیــــسولرین نــــظامین
اولمـازدی یـاره کـونلوم گرشـانه اولماسـایدی
مــنع شــراب ائـــدردیم زاهیــد مـــثالی مــنده
پــیمانی سـیندیراردیـــم پـیمانه اولمـاسایدی
مــین درد عشــقه چــاره ائــیلردی بـیر اشاره
جـان دردیــنه گــوزه للر بــیگانه اولمــاسـایدی
گـول تک گـولردی اوزلـر قان آغـلامازدی گـوزلر
گـــوندن دورو حــقیقت افسـانه اولمــاسایدی
روحوم قوشون ائدردیم جان دوستاغیندان آزاد
حاجت بو جسـم آدیـندا زنــدانه اولمــاسایدی
گنج محبت "عاصم" سالمــازدی یئر اوره کـده
جانان یـولـوندا کــونلون ویـــرانه اولمــاسایدی

صالح عاصم اردبیلی

گلمیشم

گوستر اوزون کی سیر گلستانه گلمیشم
بیر زائرم زیارت جانانه گلمیشم
لطف ائله،ویرما، قهر داشین داغلی سینه مه
درگاهینه امیدله درمانه گلمیشم
ایللر بویو تحمل ائد یب هجر دردینه
بئش گون قوناق بو خانه احسانه گلمیشم
شرمنده یم اگر چی برازنده تحفه دن
جان نقدی الده،ملک سلیمانه گلمیشم
سن سیزلیگه دوزونمه میشم،گرچه قطره یم
مین شوقیلن قوشولماغا عمانه گلمیشم
کافر آدیلا گر چی قاپوندان قاوولمیشام
رحم ائیله باری،ایندی کی ایمانه گلمیشم
سیندیرمیشام جسارتیلن عقل سددینی
دیوانسرای عد لووه دیوانه گلمیشم
تا مهریلن غرور باشین ویرمیشام داشا
مهر نگاردن سرو سامانه گلمیشم
من عشق مجمرینده اوره کدن آلیشمیشام
تسکین درده،چشمه ی عرفانه گلمیشم
نیزار تک سیزیلتی چوکوب سوزلو سینه مه
هجران نوالی،منده نیستانه گلمیشم
عشق اهلی دیر ،حقارتیلن باخما عاصمه
عالم بیلیر بو عرصه یه مردانه گلمیشم
صالح عاصم اردبیلی

عاصم قوجامان شاعر

عاصم قوجامان شاعر

داغ تک اوجالان شاعر

شاعرلر ايچينده تک

سنسن اوجامان شاعر

سوز مولکونونون شاهي

شاه دان تاج آلان شاعر

حق سوزلري دئيسن سن

ناحقي وئران شاعر

ظولم اهلينه سوزلرله

دائم اوخ آتان شاعر

ظولمت اوره گین سوزلن

اوخلئیب، یاران شاعر

ائل هاممي سني ايستير

خلقيله اولان شاعر

ائل شاعري سن حققا

درديله دولان شاعر

چوخ ساده ديلون واردور
سوزلری روان شاعر

شیرینلیگی سوزلره
چوخ یاخشی قاتان شاعر

شعرون دادي سنده ن دور

شعره دوز آتان شاعر

الله سنه يار اولسون

دوزليگده قالان شاعر

فیروزی سیزه سؤلر
حق دن دانیشان شاعر

دکتربهنام فیروزی

نامرده دو وئرمه

الهی هرنه وئرسن مرده وئر نامرده دو وئرمه
وطنداش حقینه بیگانه یه حق وتو وئرمه
جلودار ائت بیزه دانانی دوشمن اولسادا اولسون
آماندیر لطف قیل سوز قانمایان دوستا جلو وئرمه
کریم انسانه کرمان قالی سین وئر،فرش کاشان وئر
پخالت یورقانیندا یوخلایان شخصه پتو وئرمه
جناب قانمازا آت وئر ، قاطیر وئر، مال داوار لطف ائت
پوزون آرتیرماقا وئر قیرمیزی نیسان، پژو وئرمه
سیچان آرتماقدادیر آرتیر پیشیک لر نسلینی امّا
سیچاندان باشقا بوحیوان ایچون حق میو وئرمه
قارینپا کیمسه نین شوربایه آرتیر رغبتین یا رب
قوناقلیق دا عنایت قیل اونا میل چلو وئرمه
دئینگن کیمسه نین شرّینده ن ایمن قیل قولاخلاری
عمل سیز واعظین، آلت انگینه بیر بئیله تو وئرمه
دئمم میزبازی میزده ن آیری ساخلا دیغلاسین اولسون
دییم بو فرقه یه وئرسونده میز چسب اوهو وئرمه
اوکس کی بورک سندن ایسته یر باشلاره بورک قویسون
اوشخصه باش وئریب سن عیبی یوخ امّا شاپو وئرمه
اوکی حیوان کیمی بیزلنمه سه مشکل یولا دوشسون
بو حیوان خویلویا قیل مرحمت بیز وئر بوزو وئرمه
او کی مال حیوانی ایللر قویوب دی آرپایا حسرت
ائله مخلوقه یارب جو وئر امّا آبجو وئرمه
خدایا مین کتابلیق قافیه بذل ائت غزل بازه
قیزیل بازه قیزیل وئر قات باقات پول وئر پلو وئرمه
حکیما ( عاصیمین ) اشعارینه بیر کیسه دوز گونده ر
خطاسین بیربه بیر عفو ائیله ییب اغیاره لو وئرمه

صالح عاصم اردبیلی

زامان آغلاتدی منی

آغلامازدیم زامان آغلاتدی منی
دوز یولوندان آزان آغلاتدی منی
گوردوم حسرتدی همالر سوموگه
ایشله ییر شاخدا سوموکدن ایلیگه
دوزوموزده اییلیر ایری لیگه
قالدی قانماز قانان آغلاتدی منی
آغلامازدیم زامان آغلاتدی منی
تک صبیر گلدی دئدیم ایش دوزه لر
قار گئدر ، بوز ارییر یازدا گلر
نه بیلیم یازدا بوران باغری ده لر
یوخاچیخمیش گومان آغلاتدی منی
آغلامازدیم زامان آغلاتدی منی
دئدیلر بیر گون اولار ساز حالیمیز
قیتدیق اولسا واریمیز یاغ بالیمیز
ایندی کی اون تک اولوب ساققالیمیز
بو یالان سوز یامان آغلاتدی منی
آغلامازدیم زامان آغلاتدی منی
ظن ائدیردیم آغیر اولسا یارالار
یارالار آغریسین آنجاق یار آلار
نه بیلیدیم اوره گی یار یارالار
بیلمه مز لیکدی، قان آغلاتدی منی
آغلامازدیم زامان آغلاتدی منی
اره لر توشدو که جنگل جانینا
تولکی لر تور توخودو اصلانینا
طرلانی اووچی باتیر جاق قانینا
اوخدان آرتیق کامان آغلاتدی منی
آغلامازدیم زامان آغلاتدی منی
اری مز قالدی بیینده بوزوموز
گویده سایریشمادی بخت اولدوزوموز
نه قویون قالدی نه املیک قوزوموز
قوردا بنذر چوبان آغلاتدی منی
آغلامازدیم زامان آغلاتدی منی
من دئدیم باغلاسا یادلار قولومو
دایاقیم وار قورییا ساغ سولومو
قوپدی بیر چن که ایتیردیم یولومو
داغا باخدیم دومان آغلاتدی منی
آغلامازدیم زامان آغلاتدی منی
وای بیزه اولدی پوزولماز یازیمیز
مضراب اود توتدی قیریلدی سازیمیز
قالدی قیشلانمادا عاصم یازیمیز
یازی گول سوز یازان آغلاتدی منی
آغلامازدیم زامان آغلاتدی منی

صالح عاصم اردبیلی

لافَتـــــــــی الاعلی،لاسیـــــــــــف الا ذوالفقار

ساقیا!دور باده وئــــــــــــر،آچیلدی گول،گلدی باهار،
ابررحمت ائیلـــــــــــه دی صحرا و باغی لاله زار .
ناله چـک بولبول کیمی ،دور! رقصه گل دیوانه دار،
مست ومستانـــــــــــــه بواسمی سؤیله هر دم آشیکار:
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار.
بالیغین قارنیندایونس اولـــــــــدو چون زار و حزین ،
طاقتی طاق اولدو صبری گئتدی اولدو چوخ غمـــین .
حاضیر اولدو اول زامان یانـــــــــــــــیندا جبریل امین،
سؤیله دی غمدن خیلاص اول،ائیلــه بو ذکری همین:
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار .
ماه کنعانـــــــی که ائتــــــــــدی رنج زندان بی قرار،
اولدو زنجیر جفادان جیسم پاکــــــــــــــــــی پاره پار.
حددن ئوتدو چون که محنــــت،تاپمادی بیر غمگسار،
یوز دوتوب درگاه حققه ،سؤیلــــــــــه دی بی اختیار .
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار.
حضرت ایوبـــــی چون ائتـــــــــدی بلای حق نزار،
نیش کرمان ائیــــــــــــله دی جان ضعیفین زخمدار.
چون که تابی قالمادی،گئتــــــــــــدی الیندن اختیار ،
تا که ذکر ائتدی بواسمــــــــی،اولدو غمدن رستگار:
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار .
آدمی شیطان چوائتـــــــــــــــدی باغ رضواندان جدا،
بی کس و تنها و سرگـــــــــــــــــردان گزردی هریانا.
بیر طرف حوا فراقـــــــــــــــی،بیرطرف رنج و عنا
عاقبت بو ذکری ائتـــــــــــدی،اولدو هیجراندان رها:
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار .
ایسته دی یاندیرسین ابراهیمـــــــــــــی تا نمرود دون
منجنیقه قویدو، آتـــــــــدی نار و نورا سرنـــــــــــگون
تا کـــــــه دوشدو آتشـــــــه ، اولـــــدم او مرد ذوفنون
آتشی ائتدی گولوستان،سویلــــــــــه دی بو اسمی چون
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار .
چون کی خیبر قلعه سینده قالـــدی عاجــــیز مصطفی،
نا اومــــــــــید اولــــــدو که حاصیل اولمازاولدو مدّعا
گلـــــدی ناگه جـــــــــبرئیل و گتدی فرمـــــــــان خدا
سؤیلـه دی بو ذکری تـکرار ائت که گلســـین مرتضی
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار .
دشت ارجینده چو ائتدی شیر، سلمــــــــــــــــــانی اسیر
عاجیز و بیچاره قالدی،تاپمادی بیر دستگــــــــــــــــیر
یوز توتوب درگاه حققه آغلادی اول مرد پیـــــــــــــر
ظاهر اولدو اوندا ناگه شهســــــــوار شیرگــــــــــــــیر:
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار .
چون سلاســــــــــیل قلعه سینده اولدو احمد بی مدار،
نازل اولدو پیک رحـــــــــــــــــــمان ،جبرئیل نامدار.
سؤیله دی قوی منجنیقه ،آت علیـــــــــــــنی بی قرار
فتح ائدر بیر لحظه ده سؤیله بواسمی آشــــــــــیکار :
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار .
روز اوّل جبرئـــــــــــیلدن تا که حق ائتدی سؤال،
سن نه کیمسین،من کیمم ،سؤیله جوابیم اولما لال !
دئدی سن ،سن؛من منـــــم ،اود دوتدویاندی پرّ و بال
ملتجی اولدو بو اســـــــــــــمه تاکه رفع اولدو ملال:
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار.
ای نــــــــــــــباتی!مدح شاهی ائیله دائیم آشیکار ،
تا که اولـــــــــسونلار خوارجلر حسددن کور و کار.
حاصیل اولـــــــــدو تا مورادین غافیل اولما زینهار
سؤیــــــــله بواسم عظیمی دمـــــــــــ به دم بی اختیار:
شـــیر یزدان،شاه مردان،حیدر دولدول سوار،
لافَتـــــــــی الّاعَلی،لاسَیـــــــــــفَ الّا ذوالفَقار.
حکیم سید ابوالقاسم نباتی

نازا قویدی

بیر بوسه تمنّا ائله دیم یار نازا قویدی
قیشدیر دئدی وعده ی وصلین یازا قویدی
بیلمم منی گورجک نییه سرعتله سووشدی
یالواردیم ایاق تورموزا قویسون گازا قویدی
لطف ائیله دئدیم قویما بو عشقین کوزی سونسون
چونبلدی بیر آز مجمر عشقه آزا قویدی
اصرار ائله دیم لطفووی آرتیر بو حقیره
چوخلوق دئدی پوخلوقدی بناسین آزا قویدی
کونلوم قوشون، ازل؛ اوزی پروازه گتیردی
سونرا منی مرج ائیله مه گه قوشبازا قویدی
آهیم دالیسیجان او قَدَر کئش تک، اوزاندی
اولچوب حسابین ساخلاماقی بزّازا قویدی
برکیدی اَتیم پیشمه دی عشقین اوجاقیندا
باسدیردی کوله پیشمگیمی آشبازا قویدی
صادق بو غزلدن ایکی بیت ائیله دی انشا
لطف ائیله دی شعرین دالین عاصیم یازا قویدی

صالح عاصم اردبيلي

گئتمه

سن سیز اوره گیم ناره گرفتار اولو گئتمه
کئچمیش قارا گونلر منه تکرار اولو گئتمه
مین دردیمه درمان گتیریب نرگس مستون
گئتسون دل سودا زده بیمار اولو گئتمه
اون دورت گئجه لیک آی کیمی ساچ کونلومه یوخسا
زولفون کیمی آیدین سحریم تار اولو گئتمه
کونلوم قوشو چیخمازدی چمن سئیرینه سن سیز
سنلن گوزلیم مایل گولزار اولو گئتمه
حاشا گوله بیر گول اوزومه دهر ده سنسیز
گولشنده ده گوللر گوزومه خار اولو گئتمه
جان نقدینه بیر نازینی ساتسون آلارم من
کیم من کیمی اول نازه خریدار اولو گئتمه
عشاق آرا باشیم اوجالار داغ کیمی قالسون
اغیار آرا عاصیم قوجالیب خوار اولو گئتمه
صالح عاصم اردبیلی

بیر گؤزو شهلا دلیسی

اولدی کؤنلوم یئنه بیر زولف چلیپا دلیسی
دوشدو زنجیره نه خوش یئرده بو سئودا دلیسی.
عور و عریان، باش آچیق، اوز چئویریب صحرایه
قویدو مجنونو یاری یولدا بو صحرا دلیسی.
عاشیق سوخته دیر، بولبول شئیدا کی دگیل؛
کی اولوبدور دئیه سن بیر گول حمرا دلیسی!
ربّ اَرنی دیلنین ذیکری، دؤنوب موسایا
دشت ایمنده اولوب نور تجلی دلیسی.
چوخلارین مست قیلیب ساقی میخانه عشق
گؤرمدی کیمسه منیم تک بئله رسوا دلیسی
دئمه فرهادیله مجنون دلیدیر بیر بری باخ
بیری شیرین دلیسیدر، بیری لیلی دلیسی
کنج وحدتده تباه اولدی عزیز عؤمروم حئییف!
اولمادی یار منه بیر بوت زیبا دلیسی.
خوشلاییبدیر گؤره سن هانسی مزارستانی
دیون اول زاهیده ای بیر کؤکه حالوا دلیسی.
باشینی آز یئره دؤی، دنگ صیفت، ای حیوان!
آلمادی جنّتی بیر آرپایا مولا دلیسی.
گول ایاغینده سحر واختی ییخیلمیشدیم مست
بیری سسلندی کی ای بیر گول رعنا دلیسی
بیر آییل گؤر کی نباتی نئجه اوراد ائیلر
نه یاتیبسان بئله؟ ای بیر گؤزو شهلا دلیسی!
حکیم سید ابوالقاسم نباتی

فیکر وصال

من گئجه لر ياتمورام، فيکر و خيال ايلورم
سن گوزلون فيکريله، گوگلومو آل ايلورم
مژگان اوخون قلبيمه ويردون اوزون سن دونن
بو اوخولان سن مني گور، نئجه حال ايلورم
مرحمتون سن کسميب تئز تئز او اوخلاندا وير
تا سنه من سئولييم فيکر محال ايلورم
گوستر اؤزون بير ده فه جانيمي آل يوز ده فه
جان سنه قوربان ائدوم، واردو مجال ايلورم
مرحمت ايت گل بيزه الروي قوي اؤزه

منده مقال ايليوم، فيکر وصال ايلورم

دکتربهنام فیروزی

گوزلرون ده نه وار

گوزون دولوب سوزایلن بیلمیره م گوزون ده نه وار؟
اوزون گورن ده دیلیم لال اولور اوزون ده نه وار؟
باخان دا شـــــوق ایله شمشاد مثـــــلی قامت اینه
تاپانمیرام اوزومـــــــــو نازنین اوزون ده نه وار؟
آجی سوزون منه بال دان شیرین دی بیر سوزه گل
اوزون بویور بو معما نه دیر؟ سوزون ده نه وار؟
نه کوزدو کونلومو یاخدیقجا داغ لی لاله بیته ر؟
بو شـــــوره زاری گلستان ائده ن کوزون ده نه وار؟
عومور یازین دا کی کونلوم سن ایله یازلاندی
او یازلا یازلانیرام دادمیشام گوزون ده نه وار؟
او گون کی آیریلیقا چاره ، دوز ، دئدین هله لیک
اطاعتین ده وار عاصم گوره دوزونده نه وار؟
دئمه اوزون ده ، سوزون ده ، گوزون ده اولدوغونو
گوزون دولوب سوز ایلن کاش بیله ام گوزون ده نه وار؟
صالح عاصم اردبيلي

بیر گوله اول طالیب دیدار

ایتدی منی غم تاپداغی بیر گوزلری خوممار، بیر دیلبر عییار،
ساقی منه وئر لوطفیله بیر ساغرٍِِ سرشار، غمدن منی قورتار.
یوخ غایتی تقریر ایله سم مین گئجه- گوندوز، شرح غم عشقی،
پایانا یئتیشمز، نه قیلیم درد دیل اظهار، مین گیزلی سؤزوم وار.
ائتمین منی مجنونا برابر سیزی تانری، ای اهل خرابات،
گؤردو نئچه یول یارینی اول عاشیق حررار، اول ساکین کوهسار.
الله بیلیر من کیمی بیر عاشیق محروم، دونیادا تاپیلماز.
شاهیددی بو احوالا ایکی دیده خونبار، هم آه شرر بار.
هر دم دیلرم چاره اجلدن غم هیجره، گلمز کی نه حاصیل،
قالدیم بئله بو دردیله بی مونیس و غمخوار، بی یار و مددکار.
ای عشقه دوشن عاشیق بیچاره، یقین بیل! کیم دادا یئتن یوخ،
من ائیلمه دیم دوغروسو آللاهیما اقرار، خوشدورمنه زوننار.
مسدود اولوب چار طرفدن منه، یاران، ابواب فتوحات،
گویا کسیلیبدیر منه بیر محرم اسرار، بیر وفادار.
افسون و فسونون اثری اولمادی هرگیز، اول طورفه نیگارا،
آسان ایشیمی ورد و دوعا ائیله دی دوشوار، قالدیم بئله ناچار.
نه عقلده کام اولدو مؤیَسسر، نه جونوندا، ای عارف سالیک،
سن مندن ائشیت، بیر گوله اول طالیب دیدار، اگلش بئله بی کار.
فاش ائتمه گیلن سررینی هر جاهیل و خامه، اول عاشیق کامیل،
سن اولماگیلن من کیمی هیجرانا گیرفتار، مهجور و دیل افگار.
هیجران دئمیش اول دم، قلم اود دوتدو، آلیشدی، آهیم شرریندن،
بیر خنجر خونریز گتیر، باغریمی بیر یار، بیر گؤر کی نه لر وار!
زهر ائیله دیلر بو ایکی گون دیرلیگی بالله! من عاجیر زارا،
کور ائتدی منی جؤوریله بو چرخ ستمکار، جاندان نئجه بیزار!
چوخ ائتمه شیکایت ستم چرخدن، ای دیل! خوش شیوه دگیل بو،
ایسترسن اگر گؤرمیه سن طعنه ی اغیار، آه ائیلمه ، زنهار!
اول سنگدیلین باشینا چوخ دؤیمه نباتی! والله کی یانارسان،
تؤک قانلی سیرشکین، دهء گیلن صدقیله تکرار: یا حیدر کرار!
حکیم سید ابوالقاسم نباتی

بولبول گولوستانه گلسین گلمه سین؟

صبا منــــــــــــدن سؤیله او گولــــعذاره:
بولبول گولوستانه گلسین گلمه سین؟
بو هیجران دوشگونو، ایللر خسته سی
قاپیـــــــــنا درمانه گلسین گلمه سین؟
من قوربانــــــــــــی اولوم عنبر تئللرین
غنچه دوداقــــــــــلارین،پسته دیللرین.
او لاله رخساریـــن،مشکین خاللاریــن
اودونــــا پروانه گلسین گلــــــــمه سین؟
گؤزوم چوخ حسرتدیـــــر خومار گؤزونه
گونش جمالیـــــــنا شَکــــــــر سؤزونه.
اوتانیرام نئــــــــجه دئیـــــــــــیم أوزونه
دردیــــن خسته جانه گلسین گلمه سین؟
دولاشدیـــــر بوینوما شمشاد قولونو،
قوجاقلاییم،قوجوم اینـــــــجه بئلینی
لعل لبین أمیم، سوروم دیلیــــــــنی
ایستر ألـــی جانـــه گلسین گلمه سین!
نباتی ایسته مـــــز سنسیز دونیانی
عــــزّتی، حؤرمتی، شوکتی، شأنی.
بیر زادا قالمـــــــــایبدی داها گومانی
بو باش او میدانـــــــه گلسین گلمه سین؟
حکیم سید ابوالقاسم نباتی

پوخـــته اولمـــــاغا چـــــــوخ سفر گرگ

گئت دولانگـــــیلن، خامســـــن هنوز
پوخـــته اولمـــــاغا چـــــــوخ سفر گرگ.
مــــــرغ قافـــــــیله هــــمزبان اولـوب
دؤوره وورمــــاغــــا بـــــــال و پـــــر گرگ.
کوه عشـــقه گل، گئتـــمه بی دلیل،
غول دنــــــــــگ تک دوشـمه چوللره.
تا کـــــی سالـــیکه رهنــــــمون اولا،
خیضــــــر ره کیــــــمی راهــــــــبر گــرگ.
یوخ یالان دئــدیم هـــرزه سؤیله دیم،
واضحین دئیــــیم، دوغرو سؤیله ییم.
حققـــــه عــــارفی واصــــیل ائتمگه،
بیــــر دوداقــــلاری گـــــــــول شکر گرگ.
زولفی عنبـــــــــــرین خالــی نازنین،
غنچه تک دهــان،قاشی جان سیتان.
شاه گولـــــروخان، ماه بـــــــی قرین
نســـــــــترن کیــــــــــمی سیمبر گرگ.
لاله تـــــــــک أوزو آل یـــــــانـاق اولا،
تازه گول کیـــــــــــمی تر بوخاق اولا.
آغ آیـــــــــــــــــاز أوزو آیــــدان آغ اولا
قاشـــــــلاری اونــــــــــا هم سپر گرگ.
همعـــــینان اولا مهــــــــر و مار ایــله
هـــــم زبان اولا نـــــور و نـــار ایـــــله.
زولفــــــو بحث ائـــــده شاهــمار ایله
گـــــــــنج سیــــــنه سی پر گــؤوهر گرگ.
حققــــه آشـینا، خلقـــــــدن جــــــدا،
ائیلــــه میـــش اولا نفـــــی ماســـوا.
تـــــرک ائــــده بـــوتــــون یــــاردان ادا
اول مســــــیح تک بــــــی پــــــدر گرگ.
قويگــــــــــيلن قـــــــــدم ديـره لاجرم،
نقش بوتـــــــــده گور سيرر وحـــدتي.
بو چــــــگونه دن واقيــــــــــف اولماغا
بیر جنـــــــون حــــــــق،مـــــــرد أر گرگ.
آز دانیشگـــــیلن، اولگــــیلن خمـوش،
ائتمه عالمـــــی سیرر عشقی فاش.
بوردا دورمـــــــا چوخ،گئچ بو ورطه دن
بو مقـــــــوله ســــــؤز مخــــــــتصر گرگ.
منع قیلمــــــــایین چوخـدا زاهیـــدی،
عذرو وار اونون، عاشــــــیق اولماییب
او عبـــــــــــــث یئره خلق اولونماییب،
باغـــــبانه بـــــــیر کـــــــلّه خـــــــر کرگ.
جــــد و جهــد قیل، عارف اول، گؤزوم،
عــــــــــلم عشقدن اولمـا بـی نصیب.
جــوم بو بحــــــره بیر، تاپ او گؤوهری
عاشقـــــم دئیـــــــــــــن ترک سر گرگ.
راه پر خـــــــطر، بخــــــــت واژگــــــون،
زولـــــــف یـــــار تـک شب سیاهگون.
ایندی غئیــــــــــــبدن خـــــان چوبانینا
نخــــــــل طــــــــوردن بیـــــر شرر گرگ.
هر خســـــــیسه گل ائتـــمه التــجاءِ.
اولمـــــــاز اؤزگه دن حاجتــین روا،
مشکول آچـــــــماغا شاه لافَتــــــــی
عنــــــــــــــــــــــتر اولدورن شیر نر گرگ.
بو جواهــــــــیــرین یوخــــدو قیمتی،
آچگیلن گؤزوم یاخشـــی سئیر قیل.
هر بیــــــــــــــری ده یَر چین خراجینا،
موفتـــــــه وئــــرمرم، سیـــم و زر گرگ.
بیر گــــــــوزل جـوان ایسترم، همان
کیم بو سؤزلـــــری ائیله سین روان،
هاردا دیر دئسین بیــــر شکــــر زبان
کیم بو سؤز مـــــنه عامـــــــی تر گرگ.
ساقـــــــــی! گل منه جام عشقیدن
بیر کرم قیــــــلیب اؤیله مست قیل،
تا دئسینله خلـــــــــق لال اوتورماغا
بــــو نبـــــــاتی تـــــــک بخــــته ور گرگ.
حکیم سید ابوالقاسم نباتی

شهيد عشق اولوب فيض بقا کسب ائيله مک خوشدور

اگرچه ايينه تک کئچديم جهانين جمله وارين دن
هنوز آرديمجادير قيد تعلق، زلف تارين دن
شهيد عشق اولوب فيض بقا کسب ائيله مک خوشدور
نه حاصيل بيوفا دهرين، حيات مستعارين دن
حباب اشک و آه پرشرر، قيلميش مني فارغ
جهانين قصر سيم اندود و کاخ زرنگارين دن
گورونمز صورت اميد وصلين، لوح جانيم ده
مکدر دير مگر اول آينه، جسميم غبارين دن
اوزانير رشته، طول امل، ديدار ذوق ايله
خم آچيلديقجا، اول گلچهره زلف تابدارين دن
سنه دير اقتداسي طواف کوي ليلي ائتمکده
خس وخارين قوپار اي ناقه، مجنون رهگذارين دن
"فضولي" دن، ملامت احترازين ايسته ين گويا
دئييل واقف، دل سوزان و چشم اشکباريم دن
فضولي

اوز اوزه

گونش ساچ لارینی تؤکوبدور اوزه
ایستییر ظولمتون بوغازین اوزه
سؤویرم بیر ده یار گله بیزه
اؤپم دوداغیندان قویام اوز اوزه

دکتربهنام فیروزی

سئوگی دن افسانه یاراد

گؤزلیم! سالما گؤزوندن منی، بیگانه کیمین
اذن وئر، شوط ائدیم اطرافینی پروانه کیمین
بخت آئینه سی تک، سیل اوره گیندن کدری
تا صداقت باخیشیندان جوشا، میخانه کیمین
اوخو عشقین کیتابین، سئوگی دن افسانه یاراد
کؤنلومو شوقیله سرشار ائله، پیمانه کیمین
روحوم آشوفته دی، زولفون کیمی آی سیزدی گئجه م
بو پریشانلیغا بیر نظم یاراد شانه کیمین
گل گؤزللر آرا، بی رحمیلیگ آییننی پوز
سالما اؤز عاشیقینی چوللره، دیوانه کیمین
بولبولم، قهر زمان، باغدان اوزه ندن الیمی
قارا خالیندی چکن دامه منی دانه کیمین
گل ملامت داشی آلتیندا، بو بیچاره کؤنول
تالانیب قیش گونو، تاراجه گئدن لانه کیمین
گون کئچیب، آی دولانیب، ایللر اؤتوبدور هله ده
سینه ده ساخلامیشام گنجیمی ویرانه کیمین
گلمه دین، اوندا کی جان دردینه درمان واریدی
ایندی درمان دا منه درد دی جانانه کیمین
عاصمین طبعی، صداقت بولاغیندان سو ایچیر
گر چی دؤزگونلوگ، اولوب دهرده افسانه کیمین

عاصم اردبیلی

دوستلار گوروشو

دوستلار گوروشونه آنا يوردومدان
کونول بوقچاسيندا سوز گتيرميشم
ادب باغچاسيندا سولماز گوللره
آراز کيمين آغلار گوز گتيرميشم
دالغالي دنيز تک جوشوب چاغلايان
ائلر ياراسيني آچيب باغلايان
چئوريب بولودا قان ياش آغلايان
شعريزه بير چيمديک دوز گتيرميشم
اولو بابالاردان يادگارلارا
عاشيقلار جمعينده بسته کارلارا
تايسيز ايگيدلره وورغون يارلارا
منده بير وورغونام اوز گتيرميشم
شعرين اوجاغيندان قالخان کوزلره
اوزون گئجه لرده اوياق گوزلره
سينه لر ياتاغي اودلو سوزلره
سولطان ساوالاندان بوز گتيرميشم
وورغونام او آيدين گئتديگيز يولا
نه ساغا باغلي سيز نه ده کي سولا
گلميشم سيزيلن وئرم قول قولا
خورجوندا نه ييم وار دوز گتيرميشم
محبت ايپه گين آچيب سرمه گه
کونلوزون آغري سين بر آز درمه گه
ظولماتا گونش تک سينه گرمه گه
يانيقلي سازيمدا کوز گتيرميشم
ائشيتديم سوز قيزين بوردا آلان وار
عاصيمين باغيري تک داردا قالان وار
غزل باغچاسيندا نغمه چالان وار
قارا تئل سارا تک قيز گتيرميشم
من آنا يوردومون بير ديلمانجي يام
بير جوما آرزي يام، شعرم، سانجي يام
دنيزلر اونونده ايتگين دامجي يام
گونشه ديرماشان توز گتيرميشم
صالح عاصم اردبيلي

فلکین یوخدی وفاسی

جهنمده بیتن گول آدلی بحرطویلون بیر قیسمتی

فلکین یوخدی وفاسی ، نه قدر یوخدی وفاسی او قدر چوخدی جفاسی ، کوهنه رقاصه کیمی هر کسه بیر جوردیر اداسی ، او آیاق دان دوشه نی ایستیر آیاق دان سالان اولسون ، او تالانمیشلاری ایستیر گونی گوندن تالان اولسون ، او آتیلمیش لاری ایستیر هامی دان چوخ آتان اولسون ، او ساتیلمیش لاری ایستیر قول ائدرکن ساتان اولسون ، نیله مک قورقی بوجوردور ، فلکین نظمی ازلدن اولوب اضدادیله باغلی ، قره سیز آغ لار اولانماز ، دره سیز داغلار اولانماز ، اؤلو سیز ساغ لار اولانماز ، گره ک هر بیر گؤزله بیرد نه چیرکین ده یارانسین ، بیری اَنسین یئره گوگدن ، بیری عرشه اوجالانسین ، بیری چالسین ال آیاق غم دنیزینده بیری ساحلده سئوینج ایله دایانسین ، بیری ذلت پالازین باشه چکیب یاتسادا آنجاق ، بیرینین بختی اویانسین ، بیری قویلانسادا نعمت لره نینک ، بیری ده قانه بویانسین . عاصم اردبیلی

بهجت آباد خاطره سی

اولدز ساراياق گوزله‌ميشم هر گئجه ياري
گئج گلمه‌ده‌دير يار ، يئنه اولموش گئجه ، ياري
گوزلر آسيلي،يوخ نه قارالتي،نه ده بير سس
باتميش قولاغيم،گورنه دوشورمكده‌دي داري
بير قوش سويله‏‌يه‌‏‎‎‍‌رك ، گاهدان ايييلده‌ر
گاهدان اونو دا يئل دئيه لاي-لاي هوش آپاري
ياتميش هامي،بير آللاه اوياقدير داها بير من
مندن آشاغي كيمسه يوخ اوندان دا يوخاري
قورخوم بودي يار گلمه‌يه بيردن ياريلا صبح
باغريم ياريلار صبحوم آچيلما سني تاري
دان اولدوز ايسته‌ر چيخا گوز يالواري چيخما
او چيخماسا‌دا اولدوزمون يوخدو چيخاري
گلمز تانيرام بختيمي ايندي آغارار صبح
قاش بئيله آغارديقجا داها باش دا آغاري
عشقين كي قرار يندا وفا اولما ياجاقميش
بيلمه‌ م كي طبيعت نيه قويموش بوقراري
سانكي خوروزون سون باني خنجردي سوخولدو
سينه مده اوره ك وارسا كسيب قيردي داماري
ريشخند ايله قيرجاندي سحر سويله دي دورما
جان قورخوسو وار عشقين اودوزدن بو قماري
اولدوم قارا گون آيريلالي اول ساري تئلدن
بونجا قارا گونلردير ائده ن رنگيمي ساري
گوز ياشلاري هر يئردن آخارسا مني توشلار
دريا يه باخار بللي دي چايلارين آخاري
از بس مني ياپراق كيمي هجرانلاسارلديب
باخسان اوزونه سانكي قيزيل گولدي قيزاري
محراب شفقده اوزومو سجده ده گوردوم
قان ايچره غميم يوخ اوزوم اولسون سنه ساري
عشقي واريدي شهريار ين گوللو چيچكلي
افسوس قارا يئل اسدي خزان اولدي بهاري

شهریار

شیدا بولبول

شیدا بولبول! فغان ائتمه، غم یئمه
بوگون- صاباح گول آچیلیر یاز اولور
عزیز ساخلا، غنیمت بیل وجودون
وفاسی یوخ گولون، عؤمرو آز اولور
دهء گیلن فرهادا: ای محنت پیشه!
شیرندن اینجمه، چال داشا تیشه
عاشیق – معشوق آراسیندا، همیشه
عیشوه اولور، غمزه اولور، ناز اولور
خدمه لر دورور ساغ و سولوندا
جواهر بازوبند ایکی قولوندا
فوّاره لر ایشلر دائیم گؤلونده
یاشیل باشلی اؤردک اولور، قاز اولور
نباتی! سئومیشم بیر دلسیتانی
بیر سؤزو گول شکر، غنچه دهانی
داخی فاش ائیلمه سرّ نهانی
عاشیقین کؤنلونده یوز مین راز اولور

سید ابوالقاسم نباتی

عشقیمون ازلی

گوزل لرون گوزلی
سن سن دادلی، مزلی
آدووا قوربان اولوم
آی عشقیمون ازلی.

دکتربهنام فیروزی