دل دیوانه

زولفونده نه لازیم، گؤزلیم، شانه دولانسین؟
قویما او حرمخانه نی بیگانه دولانسین
عیب ایله مه، کویوندا دولانسام گئجه گوندوز
شمعین گرک اطرافینه پروانه دولانسین
ساقی دولانیم باشینا مئی جامینی گزدیر
سرمست اولوم، باشیما میخانه دولانسین
اول زولفه کونول وئرمه، دییرلر منه ال چک
اونسوز نئجه بس بو دل دیوانه دولانسین
مجنون نه برابر منه صحرالره قاچدی
عشق اهلی اودور عرصه ده مردانه دولانسین
اغیار ایله اؤز یارینی همدم گؤرن عاشیق
دوشسون او گرک دشت و بیابانه دولانسین
سرخوش لیق ایله عؤمرونی صرف ائیلمه واحید
عارف اونا دیلر کی، حکیمانه دولانسین