بو بلالي روزگارين من ايله وفاسي يوخدور

فلکين غم و بلاسي مگر انتهاسي يوخدور؟

بير اوتانماز،عار بيلمز،نه دئييم حياسي يوخدور

بو سپهر دون و ناساز،ستمين ائديبدير آغاز

ائلمز حيا،اوتانماز،بيرينه وفاسي يوخدور

ائليوب مني حواله گنه محنت و ملاله

نئيليوم ؟بو هرزه بختين منه بير حماسي يوخدور

ستم و غمي توکنمز،اؤلورمده رحمه گلمز

بو زمانه نين منيم تک غمه مبتلاسي يوخدور

دوتوب اود گنه آليشما،بئله چوخدا پيس دانيشما

بو سبب:سنينله آخر فلکين آراسي يوخدور

بو سوزي دانيشماز عاقل،اولا گر بلايه قابل

سؤله هانسي شخص کامل الم و بلاسي يوخدور

مني ده بير اؤزگه ليلي ائله دي بو چؤلده رسوا

بو بلالي روزگارين من ايله وفاسي يوخدور

يوخ ائدن بيري نصيحت،ائله سين اونا مذمت

مگر اي منيم عزيزيم بو گونون صاباسي يوخدور؟

عجب آنلاماز ايميش سن،سبيلين آغاردي بيلمه ن

نه جهت بو شوخ و شنگين سنه اعتناسي يوخدور

بو ظريف و شوخ و شيدا،ائله دي خيال گويا

آتيليبدي باشدا بورکي اؤزونون لباسي يوخدور

دونو قالماييبدي بئلدن،شالي بئش قاريش غزيلدن

آياقيندا کفش صاغري الينين حناسي يوخدور

بونو بيل بو قدر پولسوز،پلو و پالاس و جولسوز

يئرين اولسا باغ جنت گنه ده جلاسي يوخدور

بئليني کسيبدي قاتما،دور آياقه بوردا ياتما

ائله فيکر عؤمر کئچدي گيوون قفاسي يوخدور

ايشين اولدو ناله و آه،گذران دئييل بو بالله

داخي ايستمه بو عمري گئديب اول صفاسي يوخدور

ايشيميز عجب شولوغدور،بيري اهل درد يوخدور

بابا مدرسه گوروبسوز کي اونون خلاسي يوخدور؟

به خصوص اهل قزوين،کسه حق يئر اوسته نسلين

همه نابکار و بي دين بيري نين آتاسي يوخدور

هاني ايندي ملا جعفر؟اونا خصم اولا پيمبر

ائليوب يقين جزاده ، بو عمل جزاسي يوخدور

گله لعنت خدايه،يئته دردي منتهايه

دوشه قيرخ ايکي بلايه،ائشيدم دواسي يوخدور

قوي ايته(ايتسين) سؤزون دانيشما،من اؤلوم گل اوستون آچما

گؤرورن کي سد(سيد)نقيبين بو سؤزه رضاسي يوخدور

سن اؤزيوي ائتمه بي عار،سؤزي چوخ اوزاتما قورتار

ائله مه کلامي تکرار،نه چون؟ اقتضاسي يوخدور

بو کدورت و ملاله آليب ايچ نئچه پياله

عبث عمري وئرمه باده،بو جهان بقاسي يوخدور

سؤله ساقيا او مهرو،سالا مجلسه هياهو

هاني مطرب غزل گو؟ نيي نين صداسي يوخدور

تلف اولدو عمر هي هي،دور اولان اوشاقلارا دئي

هاني دنبک و دف و ني؟ نيه بس نواسي يوخدور؟

اولا گوش نه فلک کر،قالا مات چرخ چنبر

دئمه سين کسي "مغني" سسي نين غناسي يوخدور