توکوب عذاره بو مه پاره زولف قاره گلير
باخان هلالينه کج، راست ذوالفقاره گلير
چکيبدي قتليمه خنجر وليک اؤلدورمز
بو امير خيره يقين ائيلير ايستيخاره گلير
پياده وادي محنتده مات اولوب قاللام
او شاهزاده ني گؤرسم اگر سواره گلير
شکسته کؤنلومو بير گلدي ائيلدي ويران
خرابه ملکي خراب ائتمه گه دوباره گلير
گلير بو آهوي وحشي کؤنول خبردار اول
خيالي اؤزگه دي معلوم اولان شيکاره گلير
ساليبدي زولف سياهين قارا خط اوزره مگر
اؤلوب عزيزي ، ساليب قاره اوسته قاره گلير
بهار اولاندا بئله رسمدير اوخور بولبول
اوزون گؤرنده اودور کؤنلوم آه و زاره گلير
او نازنين کيمي معشوقه ، من کيمي عاشيق
بئله گومان ائديسيز بيرده روزگاره گلير
انيسيم آه و فغان اولدو مونيسيم ناله
بو غم گونونده عجب آه و ناله کاره گلير
رقيبي قويمارام عالمده راحت اَيلَنسين
او قدر آه و فغان ائيلرم که زاره گلير
يولوندا مايه نقدي توکندي صرافين
گوماني ايندي بو اشعار آبداره گلير
