کوسموشم

جانا اود ووردوم اؤزوم ، پروانه لردن کوسموشم
تا کی مجنون اولموشام ، دیوانه لردن کوسموشم
بیر غلط سؤزدور کی دئیرلر گنج اولور ویرانه ده
گنج یوخ ، ویرانه چوخ ، ویرانه لردن کوسموشم
حاصیلیم اولدو تجرددن ندامت گوشه سی
ایندی او باش آغریدان افسانه لردن کوسموشم
من ائشیتدیم ، او گولون مئیخانه لردی منزیلی
اصلی یوخ گؤردوم گلیب مئیخانه لر دن کوسموشم
خانیمانیمدان منی سالدی نباتی دربه در
عقله باخ مجنون کیمی بیگانه لردن کوسموشم

نباتی

مهربانلیق گورمه ییب بیر مه لقادن کوسموشم
گونده یوز آل ائیله ین قلبی قارادان کوسموشم
شأنینه دئدیم شیرین سوز، بیر شی اوندان دادمادیم
بو سببدن آغزی شکر دلربادان کوسموشم
بیر قدح می ایسته دیم، سیندیردی کونلوم شیشه سین
داش باغیرلی ساقی صاحب جفادان کوسموشم
چون اومان یئردن کوسرلر بیر مثل دیر خلق آرا
کوسدوگیم بیجا دگیل دیر آشنادان کوسموشم
گوردوم اول که، بناسین یارلیق ائتمگ دگیل
واقفا، اصلی بودیر من بو بنادان کوسموشم

واقف

تا کی مست اولدوم،بوتون مستانه لرده ن کوسموشم
کؤنلومو، تؤکدوکجه غم ، غمخانه لردن کوسموشم
اول فسانیمیش کی قیلدی لیلی مجنونا نظر
یوخ!دئییل دوزگون،مین اول افسانه لردن کوسموشم
بیر زاماندا کی ریا کسدی صیداقت اللرین
هم بوراخدیم مسجیدی،بوتخانه لردن کوسموشم
چون کی میگون لب لریندن کام آلیرمیش اوباشلار
می حرام اولموش منا ،میخانه لرده ن کوسموشم
ای عجب یوخدور طریقی، زولفی یاره،واقیفا!
آشینالردن کی هئچ بیگانه لردن کوسموشم
کؤنلوم اول ویرانه اولموش بیر نسیم ِ هیجرایله
تا کی جان وارمیش پکر ویرانه لر دن کوسموشم

عاشیق پکر

دوزموشوم اول قدر هجرانه دوزومدن کوسموشم
اوزموشم امید وصلتدن اوزومدن کوسموشم
اویموشام ایللر بو ظاهربین گوزون فتواسینه
اَیری لر دوز گورموشم، از بس گوزومدن کوسموشم
گورموشم چون مصلحت چنگنده طبعیم رام اولور
ائلدن الهام آلدیغیم شیرین سوزومدن کوسموشم
تکجه عاصم سونمه ییر سینه مده عشقین آتشی
سانما بئش گونلوگ سمندر تک کوزومدن کوسموشم

عاصم اردبیلی