لب جانان

يار اگر مهر و وفاني دوشونن يار اولسا
غم دئييل کي بوتون عالم بيزه اغيار اولسا
اهل دل ذوق و صفاني لب جانان دان آلير
ظلم دور عاشيقه ، جاناني دل آزار اولسا
وار نه غم گؤزلرينين خسته سينه يوخدور علاج
لب لرين چاره سين ائيلر ، نئجه بيمار اولسا
زولف و خالين او مهين گؤز ياشيم ائيلر روشن
گئجه آيدينليق اولار ، ثابت و سيار اولسا
يار اگر عاشيقه غمخوارليق ائتمزسه نه غم
غم اودور اؤزگه يه معشوقه سي غمخوار اولسا
گؤزلرين شوق ايله قان تؤکمه گه چوخ راغيبدير
مست دير ، بونجا خطا ائيله مز هوشيار اولسا
وار اميديم منه ، واحد داها ظلم ائتمه يه جک

حال زاريمدان او مهپاره خبردار اولسا