دوداقلارون

جانا سنون او گول كيمي خندان دوداقلارون
اولموش ديار حوسنوه سولطان دوداقلارون
گَل بير دوداق دوداقه قوياق اشك شوقله
سيراب ائديم اوقانیمه عطشان دوداقلارون
ای کافیرون قیزی منی سن کافیر ایلدون
نه دین قویوبدو منده نه ایمان دوداقلارون
اوز رنگي تك ملّون ائدوب دٌرّ اَشکيمي
آل قان ائدوبدي کونلومي اَلوان دوداقلارون
من جان دییَنده سن عوضینده یامان دئمه
جانانینه گوزلدی دئسون جان دوداقلارون
بختیم کیمی اگر چه قرا دور یوزونده خال
قلبیم کیمی ولیک اولوب قان دوداقلارون
گول تك خموشيدور هَله بولبول ائدوب مني
ايلر دانشسا خانه مي ويران دوداقلارون
شهلا گوزون هلالي قاشون ماه طلعتون
بونلار تمامي بيريانا، بيريان دوداقلارون
مشعل کیمی مزییَن ائدوب سرو قددیوی
یوزمین کَلیمی ائیلئیوب حیران دوداقلارون
گولدوردي گولماغون گِنه گولشنده گوللري
اورگتدي گولماغي گوله گولبان دوداقلارون
صوفینی خانقاهده ایلر پیاله نوش
پیمانه ایله باغلاسا پیمان دوداقلارون
عظم رمیمی قبریده احیا ائدر یقین
اولسا مزاریم اوسته غزل خوان دوداقلارون
معیاری لبلرونده دی کالای حوسنووین
تاپشور متاعی ساتماسین ارزان دوداقلارون
موژگان اوخيلا قلبمي دَلمیشدي گوزلرون
بير گولماغيلا ايلدي درمان دوداقلارون
اولام غلام حلقه بگوشون اولونجه من
بير بوسه ايلسه منه احسان دوداقلارون
وئرمیشدی بوسه قولی کئچن گون کریمییه
بولمم نه گوردی اولدی پشیمان دوداقلارون