ای گوزلری مستانه

اول نرگسِ مستانون ائتدي مني ديوانه
من تک دلي ديوانه گلمز داها دورانه
عاغلي ،کونولو دئيلر لازم دور هر اينسانه
عاغلي ،کونولو گتديم قورباني بو ميدانه
فرهادي اوتور گئتسون مجنوني بيل افسانه
عاشيق ليگي اورگت سن مندن گوله دستانه
من عشقووه پابندم آنديم اولا قورانه
جانانه گورا وئررم من باشيمي مردانه
کونلوم قوشو بند اولموش اول زولفِ پريشانه
اينجيتمه گيريفتاري تئزتئز ائلمه شانه
بير گوشهء چشمونله باخ عاشيقِ بريانه
عشق اودينا من يانديم شمع اودينا پروانه
گوز ياشيم اولوب سيلاب دالغا وئرور هر يانه
اي نوح گتير کشتي غرق اولمالي توفانه
واريملا يوخيم قوربان اولميش سنه جانانه
من تک دلييه بيرده عاقيل دئمه فرزانه
بير لحظه نظر قيل سن اي گوزلري مستانه
قوربان ائلئيم منده بو جانيمي اول جانه
کسمه نظرون مندن احسان ائله شاهانه
محتاج کرم جانيم، قوربان اولا خاقانه
کوسمه گوزليم مندن لعنت ائله شيطانه
گل كي باريشاق بيرده رحم ائيله بو نالانه
قارشوندا ائديم منده مين سجده ء شکرانه
آيديندا کي کافرميش گلدي اودا ايمانه
دكتر بهنام فيروزي