بایاتی لار

من قوربانام اوزه یار
گل سن گئدک بیزه یار
آلسون منیم جانیمی
فرمان ائله گوزه یار
ساچلارینی اوزه یار
هردَن بیردَن دوزه یار
قوربان اولسون بو جانیم
اَیریه یوخ دوزه یار
دادلی دوزلو تَزَه یار
اوتاقلاری بزه یار
مننَن سنون بیرلیگون
دوشمن لری اَزه یار
سورمه چکیب گؤزه یار
وئردی منه مَزه یار
سن دئدون من ایناندیم
یالان دوغرو سوزه یار
من قوربانام گوزه یار
یاندی کونلوم کؤزه یار
باخیم سنه دویونجان
سنده پوله کؤزه یار
من عاشیغام گوزه یار
گوزونده کی سوزه یار
کاش کی گلیب باغچادا
گول آچاندا گَزه یار
قولاغ آسان سوزه یار
زاوال یوخدور دوزه یار
گل سئوگولوم سَنیله
قویاغ بیر اوز اوزه یار
دئدون اوخلا گوزه یار
اورگیمی اوزه یار
وفالی یار او دور کی
چَتینلیگه دؤزه یار
دَنیزلری اوزه یار
اوزوب سویی سوزه یار
من دئمَرَم سؤزیی کی
دوداقلارین بوزه یار
باغچالاردا گَزه یار
ایاقلییا اَزه یار
بوینینا میرواری دان
مینجیقلاری دوزه یار
گوزلر سَنده سوزه یار
کؤنلوم یانیب کؤزه یار
گؤزللیگ ده تای اولماز
سَنده اولان اوزه یار
قوربانام گول اوزه یار
یارام گلیب اوزه یار
اجازه وئر اوردگیم
گؤلونده تک اوزه یار