ائیلر

عشق اوسته کونول عقلیله دائم جدل ائیلر
عقلیم اوتوزاندا کونوله تئز شَتَل ائیلر
عقلیم ائلییَر کونلومه هی پند و نصیحت
گل دوشمه بو عشقه کی سنی چوخ اَفَل ائیلر
کونلوم بئله سویلَر کی اودوم اولماسا اولماز
عشقین منه تعلیم او عهدِ اَوَل ائیلر
عاشیق کونولی یانماسا اودا سحر آخشام
اوز باغلادیغی عهدینه نَینَن عمل ائیلر
عاشیق دَگوسن، سن گوزلیم تا بیلَسن کی
عشق معشوقی عاشیق گوزونه چوخ گوزل ائیلر
پروانه کیمین یانسا کونول عشق اودوندا
آخیر اوزونی ائللر ایچینده مَثَل ائیلر
دیوانه لیگ اولدو، اونا پیشه گئجه گوندوز
بوندان اوتورو مردوم اونا هی مَتَل ائیلر
دیلداره دییَر دردیمه قیل چاره کی یاندیم
یوخ دور اونا چاره مگر اینکه اَجَل ائیلر
یانماسا اورَک گوز یاشی چیخماز مَثَل دور
عشق یاندیرار آیدین اورَگین چوخ غزل ائیلر