منيم مندن خبرسيز سينه مين آلتيندا بير من وار
کي اوندان قوزانيبدير گويلره هر يئرده شيون وار
منمليک داشيني چوخ چالميشام من سينه مه، افسوس
مگر مندن، منمليکدن، من پنهانه ايمن وار؟
ضميريمده اونو محبوس قيلميش نفسه عار اولسون
قارانليقلاردا محو ائتميش نقدري روز روشن وار
نقدري ئولمه ييب افراسياب تن، مسلم دير
اسارتدن قوتارماز چاه تنده گر تهمتن وار
سن اي مجنون کونول يئرسيز گزيرسن دشمن آرديجان
منه دنياده مندن قورخولو گور هاردا دشمن وار
او بير من دير کي وولکان مثلي ذوب ايلر وجوديمدا
نقدري پربها سيم و زر و فولاد و آهن وار
اگر رد ايله سن خار و خسي، اوندا گوررسن کيم
وجودونده توکنمز «آذراوغلو» باغ و گلشن وار
عليرضا بندعليزاده (آذر اوغلو)
