آرزيم دي كونول كوفريدن ايمانه دولانسين
شهري اوتوروب چول لري ديوانه دولانسين
ديدار نيگاره اولا لايق اوزي هر آن
جان دان ال اوزوب كعبه جانانه دولانسين
قورخوتما مني يول دا اولان درد و بلا دان
عشق اهلي گرگ صحنه ده مردانه دولانسين
عشق آتشينه يانمايان عالم ده نه بيلسين
عاشيق نيه دايم گرگ اطراف او كاشانه دولانسين
شمع روخِ جانان اوقَدر شعله لَنيبدور
قارشين دا گونش سايه لَنيب يانه دولانسين
كونلوم قوشون اينجيتمه اوچوب گئتمز عزيزيم
دايم گرگ اطراف بو ايوانه دولانسين
گل قادان آليم سرو چمن اي مه تابان
شمعون باشينا قوي گئنه پروانه دولانسين
سن بيلمه منه بيرده روا اي گوزل الله
آيدين اورگيم هيجريده ال قانه دولانسين
دكتر بهنام فيروزي
