تؤکرم ز بس اوزه گؤز ياشين
گئجه گوندوز آه و فغانيلن
بويارام بو صفحه دن عاقبت
آديمي بو اشک روانيلن
بو طريق عشقده درد دل
منيلن هميشه هماش دير
دؤزَرم قويوب گئچه بيلمرم
وار اونون رفاقتي جانيلن
نه ديزيمده تاب و توان قاليب
نه بلايه دؤزمَيه جان قاليب
نه اجل گلير مني قورتارير
نه گونوم گئچير گذرانيلن
نه گؤزومده وار يوخو ياتماغا
نه دؤزوم نيگاري اوياتماغا
گئجه صبحه تک دئييب آغلارام
يانارام بو سوز نهانيلن
هاني جان آلان کسه يانيمي
گله رحم ائده آلا جانيمي
يازيغام نئجه نيگران قاليم
بئله ديده ي نگرانيلن
بو کمند عشقه اگر دوشه
قوجالار ديرلر جوان اولور
نييه من جوان ايکن اولموشام
قوجا بس بو عشق جوانيلن
من اگر بو يولدا اولم مني
سر کوي يارده دفن ائدين
بيري قبريم اوسته اگر گله
تانيسين مني بو نيشانيلن
بو اوميديلن بوکولوب قديم
کي اولام نيگاريله همنشين
اوخ آتان بو نوکته ني تئيز بيلير
دوز اوخو آتاللار کمانيلن
باشيمي کسنده او نازنين
مني قويمايين ال آياق چاليم
بو خجالته دؤزه بيلمه رم
بويانا اگر الي قانيلن
نه قدر رضايه دئديم رضا
بو نيگاره باغلاما بئل دئدي
بئله رسمدير سوديلن گلن
گرک عاقبت چيخا جانيلن
