دوش پری لر آردینا

ای كونول گل سن بو یار بی وفادن ال گوتور

قوی سنی بو درد اولدورسون دوادن ال گوتور

یار و یولداشدان اومید اوز، قوم و قارداش ایسته مه

یوم گیلن بیگانه دن گوز،آشنادن ال گوتور

اوخشادین گول اوزلری اویدون بو قاره گوزلره

حاصلی نولدو؟ هوس بسدیر،هوادن ال گوتور

فتنه دیر عشق مجازی،فتنه دن قورماق گرک

عشق نفسانی خطادیر بو خطادن ال گوتور

ای منی گوزدن سالان مهر و وفاسیز سئودیگیم

گر یوخون مهر و وفا باری جفادن ال گوتور

وعده وئرمیشدین نئجه اولدو؟ عهد قیلمیشدین هانی؟

کیم دئدی سن عهدیوی سیندیر وفادن ال گوتور؟

زاهد بیچاره بسدیر، بیر بئله قیلدین نماز

سبحه و سجاده نی یئق بو ریادن ال گوتور

بیر بئله ای خواجه یيقدین مال دونیا دویمادین؟

تا نه وقته حرص؟ بو فانی سرادن ال گوتور

تاجر بد نفس خوش ظاهر! پیمبردن اوتان

بسدیر ای نامرد، تنزیل و ربادن ال گوتور

ای داداش گئچدی جوانلیق،موسم سور و سرور

یيق بساط عشرتی، سیر و صفادن ال گوتور

تا بیلیرسن،عقله قوللوق ائیله نفسین بورنون اوو

دوش پری لر آردینا دیو دغادن ال گوتور

اوز گماننده بودور: من عاقل و فرزانه یه م

لاف وورما هیدجی بو ادعادن ال گوتور