الله آیی

گلدی گئنه الله آیی مردم مسلمان اولاجاق
گوناه لاردان توبه ائدیب لایق ایمان اولاجاق
گونوزلری اوروج دوتوب صبحدن آخشاما جان یاتوب
تانری سونون درگاهینا گئجه لر نالان اولاجاق
یاغلی فطیر بالنان قایماق چلوکباب جوجه کباب
حاجی لارا ارباب لارا افطارا احسان اولاجاق
اِئو ییه سی حاجی آقا قوناقلیقدا پوز وئرمگه
او قدر غذا دوزدورجگ، سفره لر الوان اولاجاق
سفره باشیندا اولانلار او قدر یئیب مست اولاجاق
یاری یئیلمیش غذالار سفره ده تالان اولاجاق
غذا لارین آرتئق لاری هارا گئدیب نجه اولاجاق؟
باخسون اگر آشغال لارا اوردا نمایان اولاجاق
آجلیغیندان ضعیف اولوب بیر دری بیر سوموگ قالیب
یوخسول لارین کاسیب لارین پیشه سی افغان اولاجاق
باهالیغون قیلینجیننان آماندا قالماق دان اوتور
بیوه زَنَن یتیم اوشاق طالب قالخان اولاجاق
کسیک تویوق قاناد آچیب قیمتی پرواز ائده جک
اَت ، تویوغون قیمه تینه باخانلار حیران اولاجاق
آی آقالار گؤز لروزی سیلون بیر ده یاخشی باخون
یوخسول لارون اورک لری افطارا بریان اولاجاق
یوخ خبری توخون آجدان اولسا اگر قونشو سوندا
بوجور آدام قیامت ده عازم نیران اولاجاق
یوخسول لاری گرک تاپاق دردلرینه چاره تاپاق
آیدین گوروب یوخسول لاری اورگی آل قان اولاجاق