تب عشق

چشم سيه يار دل پير ايلن اوينار
آهوي خطا ديديه باخ شير ايلن اوينار
سالميش اوزه تک خاليني يانديرسين حريفي
ليلاج دغل بازدي تدبير ايلن اوينار
آئينه ده اؤز عکسينه ياريم اولوب عاشيق
صورتگره باخ چکديگي تصوير ايلن اوينار
صبريم کسيلير عُمر آزالير محنتيم آرتار
فوج مژه تا غمزه، پي پير ايلن اوينار
روحيم اوچار از بس کي سيزيلدار دلِ زاريم
مطرب کيمي دستگاه بم و زير ايلن اوينار
اويناتماغا يوخ زولفون اگر اولما مکدّر
ديوانه اولان حلقه ي زنجير ايلن اوينار
مستانه گؤزون اوينادا قاش، ائتمه ملامت
ميخانه ده هر کيم قالا شمشير ايلن اوينار
تؤک خنجر ناز ايله قيزيل قانيمي، دورما
صياد هاچان توتدوغو نخجير ايلن اوينار؟
چوخ ائيلمه پيچ و خم و دستاريله بازي
قورخام ديه لر فتنه دي تزوير ايلن اوينار
اوينار تب عشق ايله وجودوم گئجه گوندوز
صراف دي گويا غم اکسير ايلن اوينار