بت طنّاز

اگر چي ناز و غمزه اول بت طنّازه لازيمدير
ولي ناز ائتمگه بير حد و بير اندازه لازيمدير
گؤتور مرحم طبيبيم توتما زخم سينه سوراخين
بو دارالملک عشقه بير آچيق دروازه لازيمدير
کؤنول مشّاطه قانين شيشه يه گر توتسا قوي توتسون
رخ جانانه چون زينت زماني غازه لازيمدير
اگر سلطان ملک عشق سن وئر ساخلاما باشين
خيال منصب سردارليق سربازه لازيمدير
مني صبّاغ درد و غم بويار هر گونده بير رنگه
يقين معشوقه ي عشقه لباس تازه لازيمدير
چيخيب ترتيب دن اوراق اولوب مجموعه ي جسميم
محبت رشته سيندن جلديمه شيرازه لازيمدير
نهفته رازدير آغزين اوني اغيارا بولدورمه
او گيزلين سرّه همراز اولماق اهل رازه لازيمدير
دگيل لازيم کؤنول گنجشکيني پابند زلف ائتمک
او محکم پاچه بند اي نازنين! شهبازه لازيمدير
چمنده باغبان شمشاد و سروين ريشه دن کسدي
گؤروب چون شانه ي شمشاد او سروِ نازه لازيمدير
دئيين صرّافه چوخ لاف محبّت ويرما آرام اول
بساط عشقه گيرمک صاحبِ اعجازه لازيمدير