ایستمم

منظریم اوزون، مقصدیم اوزون
من اوزون دکی خالی ایستمم
دون منه سن باخ اوزووه قوبان
دوقداق شیرین دوربالی ایستمم
گل گئدک ائوه، ای گوزل یاریم
خانه نی داهی خالی ایستمم
وئر منه اوزون شوقی رغبتی
اوزگه وئردیگی حالی ایستمم
دانیشسون منه سن شیرین شیرین
اوچماغا داها بالی ایستمم
خوشدو یازداکی گولده کی چیچک
یازی اولمایان سالی ایستمم
ائوده گرچه یوخ فرشیدن خبر
اوزگه وئرسه گر قالی ایستمم
مُفلیسَم اگر یوخدو هئچ زادیم
ویزریلَن گَلن مالی ایستمم
ایستورم گوزل سروِ قامتی
قدی خم اولان دالی ایستمم
شعر و نثریمون متنی مضمونی
اولماسا اگر عالی ایستمم
چوخدو رغبتیم او گوزل اوزه
قیلیلَن اوزون قالی ایستمم
گورمَسَم اوزوم یاریمون اوزون
گئتمَرَم گورا فالی ایستمم
تئز گئدَم گرگ باغِ جننته
قالماغا اوزوم دالی ایستمم
آيدين اول خموش چوخ دانیشماغی
اول گیلن بونی حالی ایستمم

دکتر بهنام فیروزی