کونلومی قان ایله میسن

دیدیم: ای غنچه دهن ،کونلومی قان ایله میسن
دیدی: بیجا یئره عشقیمده فغان ایله میسن
دیدیم: انصاف ایله اینجیتمه منی عاشیغینم
دیدی: گیت،سریمی دونیایه عیان ایله میسن
دیدیم: آغلاتما منی سرو بویون شوقینده
دیدی: گوزیاشینی بیهوده روان ایله میسن
دیدیم: آخیر گوزلیم ،باغ و بهاریم سن سن
دیدی: سن عمرینی حسرتله خزان ایله میسن
دیدیم: آز چکمه میشم گوزلرینین حسرتینی
دیدی: اوز کونلونی یئر سیز نگران ایله میسن
دیدیم: عشقینده اسیرم ، منه بس خیری نه در؟
دیدی: اولده بو سوداده زیان ایله میسن
دیدیم: عشق آتشی نیلر منه ؟ قورخان دگولم
دیدی: بیچاره ،یانارسان،نه گمان ایله میسن ؟
دیدیم: ای گول ، من ازلدن ده گوزل عاشیغینم
دیدی: سن روحینی عشق ایله جوان ایله میسن
دیدیم: هر گون سر کویینده دولانماقدیر ایشیم
دیدی: واحید،نه گوز ل یئرده مکان ایله میسن