سني گؤزلر

دؤن گل گؤزومون نورو بو گؤزلر سني گؤزلر
يوللاردا قويوب گئتديگين ايزلر سني گؤزلر.
سن گئتميسن افسوس قالان بيرجه غميندي
سنسيز بو غمي کؤنلوم عزيزلر سني گؤزلر.
گؤزلر يولونو حسرت ايله عاشيق اولانلار
تک بيز دئييليک، بيز تکي يوزلر سني گؤزلر.
سئوديم سؤزونو کيمسه يه سنسيز دئيه بيلمر
قلبيم بو تميز سئوگيني گيزلر سني گؤزلر.
سندن اوتانيب گيزلنه جک اَيري گزنلر
آمما نه قدر وار ايسه دوزلر سني گؤزلر.
معصوم ملگيم گل يئنه سن «ناري»ني ديندير
شيرين ـ مزه‏لي، سئوگيلي سؤزلر سني گؤزلر.

جسور ناری