سن سیز

عشقین منی دوندردی گولوم بلبله سن سیز
کونلوم توتولار باخسام اگر بیر گوله سن سیز
زولفون اوجو گوستردی منه عشق کمندین
دوشدوم یئنه مجنون کیمی دیلدن دیله سن سیز
بیر گون اوزونین هجری بیر آی اولدی گوزومده
زولفیندن ایراق دوندی گئجه م بیر ایله سن سیز1
لیلاسی اوچون دوزمه دی بیر محنته مجنون
حقّ عاشقییم دوزموشم هر موشکوله سن سیز
هر عاشقین اوز یارینه دیر مئیلی منیم ده
مئیلیم گوله یوخدور هوسیم بلبله سن سیز
گوز یاشی ایله بسله دیگیم نخل امیدیم
گلمز گوزلیم بیر گول آچا حاصله سن سیز
سن گورسن اگر واحدی رحمین گلر ای گول
بیچاره ائدیر آه و فغان بیر بئله سن سیز

1 گوردوم اوزونو فیکری بیر آی قالدی باشیمدا
گوزلردن ایراق دوندی گئجه م بیر ایله سن سیز