مستم

من او آی کیمی اوزوندن مستم
دئدیگون شیرین سوزوندن مستم
وئردیگون ازل می ی الستن
همیشه لیگ من اوولدن مستم
عاشیقم سنه عالم لر بیلسون
گوزل اوزوون شوقیندن مستم
او گوزل گوزون تایی تاپیلماز
عاشیق اولدوغوم گوزوندن مستم
آتدیغون اوخون دَیدی هدفه
ویردیغون اوخون شستیندن مستم
مهرونله اوزون قلبیمی آچدون
بو گوزل اولان فتحوندن مستم
قوی سنه دئییم یار مه لقا
من سنون دائم ذکروندن مستم
سنون حسنوون ذوقی ائیلئیوب
کونلومو شیدا، بولبولدن مستم
سوزلریمه سن ائتدون عنایت
لطفوون دادی دوزوندان مستم
اوخویان دئیور صد بارک الله
فیروزی سنون شعروندن مستم

دکتر بهنام فیروزی