یاراشیر

اگر سن ائیلییه سن قتلیمه فرمان یاراشیر
دوراندا اوز به اوزه جانیله جانان یاراشیر
منه او آل یاناغوندان اوپوش کرامت ائله
گدایه هر نَقَدر اولونسا احسان یاراشیر
تبسم ائله عزیزیم بیر ده من سنه قوربان
اوزونده غنچه دوداقلار سنه خندان یاراشیر
باخاندا من گوزووَه تازه جان گلور بدنه
دئسم او گوزلرو وه چشمه ی حیوان یاراشیر
تمام ی عالم ایچینده تاپیلماز هئچ بئله گوز
تمام ی عالم اولا گوزلره حیران یاراشیر
باخاندا گون اوزو وه گوزلریم منیم قاماشیر
توکولسه گون اوزو وه زولف ی پریشان یاراشیر
ساچور عطیرلی گولون عطر گولستاندا هنوز
منیم گوزوم یاشی اونا مثل باران یاراشیر
اوخونسا گر جامالوندا سنون احسن التّقویم
گلوبدو وصفون اوچون آیات ی قرآن یاراشیر
منیم فراقیدن تالانان کونلوم اولوب ویران
کونول قوشو سنه گر یئتیشسه هر آن یاراشیر
ترحّوم ائله گل آل بوجانی قوتار جانیمی
منیم بو جانیم اولا گر سنه قوربان یاراشیر
دیینده فیروزی وصفون ده شعر و سوزلرینی
دئییلسه ده اونا گر بولبول ی دستان یاراشیر

دکتر بهنام فیروزی