کونلوم

گلوبدور تنگه اي ظالم ، ستمله قان اولان کونلوم
هميشه باغ وصلينده ، گولوب خندان اولان کونلوم
دوشوب مجنون کيمي ، صحرايه بير ليلي فراقيندا
بوتون عاشقلر ايچره ، منبع عرفان اولان کونلوم
نه اولدو بيلمه ديم دوشدو ، جدا گولزار کويوندان
هميشه خوان وصلين بزمينه ، مهمان اولان کونلوم
کيمه بيلمم ، گئديب اظهار قيلسين محنت عشقين
دؤنوبدور قانه هجرينده غمي پنهان اولان کونلوم
نه چاره ائيله سين ، بيلمم خلاص ائتسين اوزون غمدن
اسير محنت و پا بسته هیجران اولان کونلوم
اولورمي بير زمان خرم ، يئتيشسه وصل جانانه
غم هیجرينله افغانلار چکيب ، گريان اولان کونلوم
منم فرهاد ! عصرين سئوديگي واحد گوزللر دير
اودور کي لاله داغين گؤسترير ، ويران اولان کونلوم