۲۱ بهمن، ۱۳۸۸

نیلیم

کونول مولکون شرارِ آتشِ عشقیلَه دمساز ائتمه ییم نیلیم
اورگ یاندی، کباب اولدی، اگر من ناله نی ساز ائتمه ییم نیلیم
عمل ده گرچه یوخدور هر زادی وار ائتمک ایمکانی بو دونیاده
اگر منده خیال آتین بو میدان ایچره تک تاز ائتمه ییم نیلیم
قارانلیق دور، صفا یوخ دور کونول لرده، چیراغ یانمور اورگ لرده
قارانلیق دان ایشیق لارا، یول آچماغا، نولی فاز ائتمه ییم نیلیم
گوزل لیکله دولوب هریان باخار اینسان اولار حیران،قالار ویلان
گوزل لیکدن قالیب ویلان، اولوب حیران، پرواز ائتمه ییم نیلیم
گئدیب هیجران، یئتوب وصلون، قارا زولفون کَسور باشیم، توکور قانیم
گوزل سن دِ ایتی بو خنجرِ زولفه اگر ناز ائتمه ییم نیلیم
قارا قاش گوز آلار جانی اولار جانی، لبِ لعلون ایچَر قانی
او گوزلرله اولب لره، بو گوزلرلن چاره،ساز ائتمه ییم نیلیم
قاش اویناتما! آتار گوزون اوزون اوخ لار باتار تئز تئز جانا اوخ لار
بو حالیله اوزون سن دِ من آغلایب نوا ساز ائتمه ییم نیلیم
دییَر قان قان، ویرار دایم منی اوخلان، ائدر کونلو بئله شان شان
بو خون خواری گورَن ده، منِ بیچاره صلح آغاز ائتمه ییم نیلیم
گوزل گویچک بو دعواده اولار غالب، اوخور اِنّا فَتَحنا نی
سنون ظالیم بو فَتحونلَه، یازیغ کونلو سرافزاز ائتمه ییم نیلیم
یاناق لارون چیراغ لار تک یانار دایم، خومار گوزلر ائدَر جِلوه
قاماشسا گر گوزوم اوندا چیراغون نورینی آز ائتمه ییم نیلیم
کوسوب مندن،گئدوب بیزدن، اَسوب یئل لر سو لوب گولشن، أولوب بولبول
قوناق گَلسه گوزل گویچک یاریم بیردن،اونو ناز ائتمه ییم نیلیم
نیازیم وار سنه، یوخ دور اَلیمده احتیاجدان باشقا هئچ بیر زاد
بو وار یوخ لان سنه هر آن منده اظهارِ نیاز ائتمه ییم نیلیم
کونول ویلان و ویران اولسا دا یاددان چیخارتماز هئچ سنی بیر آن
اوزون قیبلَم ، او اوزووه اوز، دوتوب هر دَم ناماز ائتمه ییم نیلیم
قلم اَلده یازارسان سنده فیروزی! شیرین شعرون،سحر آخشام
اوخویاندا سئویننَم من ، بوجور لیگلَن قیشی یاز ائتمه ییم نیلیم
دکتربهنام فیروزی