یالوارما

کونول وفاسیز اولان نازلی یاره یالوارما
نه اعتبار اونا ، بی اعتباره یالوارما
داریخما یاخشی یامان روزگاریمیز کئچه جک
بو بئش گون عومره گؤره ، روزگاره یالوارما

سنین ده بیر گون اولار نوباهارین ای بولبول
خزان جفاسینه صبر ائیله خاره یالوارما
فقیره ، عاجزه ، مظلومه احترام ائیله
عدویه قان ایچیه نه ظلم کاره یالوارما
وطن یولوندا اولوم مرد اوچون سعادت دیر
حیات اوچون فلک کج مداره یالوارما
مخالف اهلینه باش اَیمه سن ده منصور اول
اناالحق اوسته چکیلسن ده داره یالوارما
محبت اهلینه واحید همیشه خدمت ائله
نه تاجداره نه بیر شهریاره یالوارما